35. อ+อี+สฺสาทีนํ พฺยญฺชนสฺสิญ
กฺริยตฺถา ปเรสํ ออาทีนํ อีอาทีนํ สฺสาทีนญฺจ พฺยญฺชนสฺสิ+ญ โหติ วิภาสาฯ ววตฺถิตวิภาสา+ยํฯ สฺเสติ สฺสาทีนํ สฺสติอาทีนญฺจาวยโว คหิโต, ‘‘อูพฺยญฺชนสฺสา’’ติ สิทฺเธปิ ตฺยาทีสุ เอเตสเมวาติ นิยมตฺโถ+ย+มารมฺโภฯ ลสฺสาการโลเป โอ+อวาเทเส ภวิสฺสติ, ภวิสฺสนฺติฯ ภวิสฺสสิ, ภวิสฺสถฯ ภวิสฺสามิ, ภวิสฺสามฯ ภวิสฺสเต, ภวิสฺสนฺเตฯ ภวิสฺสเส, ภวิสฺสวฺเหฯ ภวิสฺสํ, ภวิสฺสามฺเหฯ
กมฺเม –
49. กฺยสฺส สฺเส
กฺยสฺส วา โลโป โหติ สฺเสฯ สุขํ ตยา อนุภวิสฺสติ, อนุภวิสฺสนฺติฯ อนุภวิสฺสสิ, อนุภวิสฺสถฯ อนุภวิสฺสามิ, อนุภวิสฺสามฯ อญฺญตฺร อนุภูยิสฺสติ, อนุภูยิสฺสนฺติ อิจฺจาทิฯ เอวํ ปรจฺฉกฺเกฯ ภาเว-ภูยิสฺสติ ภูยิสฺสเตฯ
กตฺตริ-ปจิสฺสติ, ปจิสฺสนฺติ อิจฺจาทิฯ กมฺเม-ปจิสฺสติ โอทโน เทวทตฺเตน, ปจียิสฺสติ, ปจฺจิสฺสติฯ ปจฺจิสฺสนฺติ โอทนา ปจียิสฺสนฺติ, ปจียิสฺสเร, ปจฺจิสฺสเร, ปจฺจิสฺสนฺติฯ
คมิโต กตฺตริ-โส คจฺฉิสฺสติ, เต คจฺฉิสฺสนฺติฯ ตฺวํ คจฺฉิสฺสสิ, ตุมฺเห คจฺฉิสฺสถฯ อหํ คจฺฉิสฺสามิ, มยํ คจฺฉิสฺสามฯ คจฺฉิสฺสเต, คจฺฉิสฺสนฺเตฯ คจฺฉิสฺสเส, คจฺฉิสฺสวฺเหฯ คจฺฉิสฺสํ, คจฺฉิสฺสามฺเหฯ สคฺคํ คมิสฺสติ, คมิสฺสนฺติฯ คมิสฺสสิ, คมิสฺสถฯ คมิสฺสามิ, คมิสฺสาม อิจฺจาทิฯ กมฺเม-คจฺฉิยิสฺสติ, คจฺฉิยิสฺสนฺติ อิจฺจาทิฯ กฺยโลเป คมิสฺสติ, คมิสฺสนฺติ อิจฺจาทิฯ ตถา ฆมฺมิสฺสติ ฆมฺมียิสฺสติ, ฆมฺมิสฺสนฺติ, ฆมฺมียิสฺสนฺติ อิจฺจาทิฯ